Talumpati

Lasong Nakakubli: Ang Pagkalulong ng Kabataan sa Pornograpiya

Mga kababayan kong Pilipino, hinihingi ko ang iyong atensyon at mga puso.

Sa panahong ang pagbabago at pangingibaw ng teknolohiya ay puwersang hindi maikakaila, isang tahimik ngunit mapanganib na salot ang unti-unting sumisira sa kinabukasan ng ating bayan, ang pagkalulong ng ating kabataan sa pornograpiya. Habang tayo ay abala sa ating indibidwal na mga buhay, isang madilim na katotohanan ang bumabalot sa isipan ng mga batang hindi pa handa sa ganitong uri ng impluwensya.

Minsan ba’y napansin natin kung paano ginugugol ng ating kabataan ang kanilang oras sa harap ng mga screen? Ang Internet, na dapat sana’y isang daluyan ng kaalaman, ay nagiging lason na nagpapalabo sa kanilang pananaw sa tunay na kahulugan ng pag-ibig, respeto, at dangal. Sa murang edad, sila’y nalulubog sa ilusyon ng kalibugan, at ang mas masaklap, wala silang sapat na gabay upang maunawaan ang panganib na dulot nito.

Ang pornograpiya ay hindi simpleng libangan, ito ay isang lason na sumisira sa moralidad at nagkakait ng dalisay na pag-iisip. Inuubos nito ang oras ng kabataan, hinuhubog ang kanilang isipan na ang babae ay isang gamit lamang para sa pansariling aliw, at binabago ang kanilang pagtingin sa relasyon bilang isang bagay na pisikal lamang. Sa halip na pagtuunan ng pansin ang edukasyon, pangarap, at pagpapanday ng kanilang kinabukasan, mas inuuna nila ang makamundong pagnanasa.

At ano ang bunga nito? Tumataas ang kaso ng teenage pregnancy, dumarami ang mga sirang pamilya, at ang respeto sa kababaihan ay unti-unting naglalaho. Ang mas masaklap, ang ilan ay nagiging biktima ng karahasan, mga kabataang nalulong sa pornograpiya na hindi na makontrol ang kanilang pagnanasa, kaya't nauuwi sa pang-aabuso. Hindi ba’t ito’y isang trahedya na dapat nating wakasan?

Huwag tayong magbulag-bulagan! Hindi sapat ang aralin sa silid-aralan kung ang ating kabataan ay tinuturuan ng ibang leksyon sa madilim na sulok ng Internet. Mga magulang, kayo ang unang dapat gumabay sa inyong mga anak! Huwag hayaan na ang teknolohiya ang humubog sa kanilang pag-uugali. Ang responsibilidad ng pagkalinga at wastong paggabay ay nagsisimula sa tahanan.

At tayong lahat bilang isang lipunan—kailan tayo magigising? Kailan tayo mag-aalarmang ito’y hindi isang usaping dapat ipagwalang-bahala? Hindi natin maaaring isantabi ito at ituring na normal. Ang kabataan ang kinabukasan ng ating bayan, ngunit paano kung ang kanilang isipan ay lason na ng malaswang imahe at maling pananaw sa paggalang? Kung tunay nating mahal ang ating bayan, dapat nating protektahan ang hinaharap nito.

Mga kaibigan, ito na ang panahon upang kumilos. Iparating natin ang mensaheng ito sa bawat tahanan, paaralan, at pamahalaan. Itigil ang pagpapalaganap ng pornograpiya. Huwag nating hayaang ang kasalukuyang henerasyon ay maging alipin ng makamundong pagnanasang sekswal. Ang pagbabago ay nagsisimula sa atin, sa ating desisyong ipaglaban ang dalisay na pag-iisip at malinis na pananaw para sa ating kabataan.

Ang Pilipinas ay hindi dapat magpadaig sa makamandag na suliraning ito. Muli nating buhayin ang dangal, respeto, at tunay na pagmamahal sa ating lipunan.

Maraming salamat.